lundi 30 janvier 2012

علاش ما نتكيفش زطلة و علاش انا ضد العام والفسبة


الموضوع هذا عندي مدة نحب نحكي عليه, على خاطر برجولية شي يدوخ. قبل ما تقولو هذا اليسار المائع الي مايفهم مالحرية كان الزطلة والبورنو, حاول ركز معايا تو تفهم انها المشكلة اجتماعية بالاساس و حرية شخصية ثانيا... ولو بالنسبة ليا انا الزوز مربوطين ببعضهم.
كيفما قلتلكم في العنوان انا ما نتكيفش اما كل ما نسمع بشكون خذا عام وفسبة يطلعلي الدم الراسي علي قد ما تظهرلي الحكاية ما فيها حتى طرف (لوجيك).


Ben Harper - Burn One Down


علاش ما نتكيفش

ما نتكيفش على خاطر انا اختكم عاندي قابلية بش نولي (اديكتت) ال كل شي...
اول حاجة تبليت بيها من صغر سني هي الكوكا, او بالاحرى المشروبات الغازية اما (بلو سبيسيالمون) الكوكا... كوكا كي نقوم, كوكا كي نرقد, صباحا مساء و يوم الاحد و خاصة يوم الاحد... و الى يومنا هذا ما تخلصت منها هالحكاية العورة لين ولاو عندي مشاكل متاع معدة (بويسك) نضرب في الكوكا عالصباح وعالخوا هي و صديقها الحميم السيقارو الي تو نرجعولو مبعد...

ثاني حاجة, الالعاب الالكترونية, مرة قعدت نهارين نلعب (بالبلاي) وقتها ب (ريزيدنت افييل) لا ماكلة لا نوم لين جيت دايخة فوق الطاولة متاع بيت الصالة... تقول شعفت مبعد؟ ابدا و حاشا و كلا, كل ما نطيح بلعبة تعاود تصيرلي نفس الحكاية, تي مرة خذيت كونجي جمعة من الخدمة بش انجم نكمل (زلدا) على ال (ويي)(بويسك) لازمني نرجعها المولاها وقعدت وخيتكم نلعب صباح وليل ونضرب في الشكالط والقطانيا والكوكا وما نقوم مالفرش كان بش نمشي للتوالات حاشاكم... و زدتلها في جمعة 5 كيلو ولا هوما 4, (اون تو كا) التوا لا نجمت ننحيهم... (اون بلوس) ما نتغرم كان بالالعاب الي تفوت 100 ساعة لعب, زلدا - فينال فانتيزي – برسونا الخ... الكلها فوق 100 و حتى لوكان عباد اخرين يكملوها في اقل وقت معايا انا مهأءه لازم نفليها اللعبة ونحل الكنوز الكل ومانخليش دار ما ندخللهاش ولا زومبي وما نقتلوش ولا (كات) ومانعملهاش...

ثالث و اهم حاجة, و(سورمون) اخيب حاجة هي الدخان... اش بش نقلكم, الدخان تولدت وانا دايرة بيه, العايلة الكريمة الكلها تتكيف من الام للبو للخال للعمة, صحيح ماكانوش يتكيفو بحذانا وقتها احنا صغار, اما تربيت على اساس انها حاجة عادية ومافيها باس, كيكبرت شويا ووليت نفهم فسرولي الي هو الدخان خايب ومضر بالصحة واندراشنوا ويضهرلي كان مافسروليش خير, ولالي وقتها الدخان (الفروي انتردي) نحلم بيه في الليل وسكنلي مخي, لين نهار وانا في الليسي طحت ببنت الحلال (وتنجم تقول هيا زادة) وقلنا هيا نجربو, وجربنا, ويا ليتنا ما جربنا... ولاتلي سوسة حشاكم, كيفها كيف الكوكا الي (دايور) كيفما قلتلكم صحاب ومايفارقوش بعضهم... ساعات حتى ماعينيش بيه اكا السيقارو اما نشعلو ونطفيه في شطرو خاطر يجيبلي الردان حاشاكم, وكي تسألني علاش تتكيف كي العباد الكل نقلك قلق و عندي مشاكل ومانتكيفش برشا وتو نبطل وتلقاني نتمسكن أما في الحقيقة الكلو تفليم... نتكيف هكاكا وماعينيش حتى بش نبطل و فكوا عليا, بدني وانأ حرة فيه يعجبكشي توا...

رابعا وأخيرا الانترانت ومشتقاتها من شبكات اجتماعية, (لول كاتس), (مام), يوتوب, (تيليشارجومونات), (سيريات)... هاذي موش لازم نتعمق فيها برشا على خاطر (فينالمون) الكلكم كيفي و تعرفوه بالقدا اكا الاحساس الي كتروح الدارك تلقا الانترنات قاصة, ولا يجي ارديناتورك ويكيكس, ولا, وهاذي قالتلهم اسكتو, يجيو يقولولك راهو (ميقاابلود) سكروه الاماركان وا اسفاه

نهار غزرت ال روحي في المراية نلقى كرشي دازة من الكوكا, عينيا محوقة من كثرة السهريات على الاردناتور مابين لعب وانترنات و شفايفي زرق مالدخان, ماعقلتش روحي وجاتني مش صدمة, صرفاق عفاكم الله, عاد غزرت ال روحي في عينيا وقلتلها تاقف غادي... مش نيزي من ها الحكايات هاذوما, هاذاكا لازمو برشى وقت وخدمة وانا ماعنديش وسع البال, أما, (او موان) ما نزيدش عليهم حاجات اخرين... هذاكا علاش لا نشرب لاقهوة لا شراب وحاجة اسمها مخدرات خفيفة ولا رزينة مانحبش حتا نسمع بيها...

دونك الزطلة مانتكيفهاش (بار برانسيب)... موش على خاطر خايفة مالحاكم (ولو هو عام حبس واحد مايفذلكش بيه) ولا خايفة مالفلوس, هكاكة, على خاطر ماعينيش بش نكمل على مابيا, على خاطر فسرولي مليح الي هي تعمل (اديكسيون) ولو انها اقل مضرة مالدخان اما 
هذاك تبليت بيه ملي صغيرة وفات الاوان...


علاش انا ضد العام والفسبة؟

علاش؟ ساهلة ياسر, كل واحد حر في بدنو...

توا الي قلتو الكل من قبيلة كنت انجم نلخصو في كليمتين خفاف نظاف, أما اخترت بش نطول موش على حاجة أما بش تفهمو الي أنا اخترت بش مانتكيفش زطلة, أما نضرب في الدخان على حساب ستة, لآخر يشرب, لأخرى داها وشواها الفايسبوك, وفما شكون الشكالط ولا المقلي... تي (براف) حبيت نوصل الي راهو الحاجات الي تعمل الإدمان كثيرة و متعددة وأكثريتها ماهيش مشلقة وكلها الإفراط فيها مضر بالصحة, (دونك) ياما يوليو يحطو العباد في الحبس على الحكايات هاذوما الكل موش كان الزطلة ياما تاقف غادي انت زادا...

 Le Cannabis : moins dangereux que l’alcool et le tabac

حاجة أخرى, تحليل الدم هو اعتداء جسدي... راهو يغرسولهم إبرة (وفما برشا كيراو إبرة (سي ديجا) يهبلو وخواطرهم تدور) ومبعد ينحيولهم طرف ولا برشا دم والله مانعرف. شنوا الفرق مابين هذا وبونية؟ الوجيعة موجودة, والدم خرج, وهي ساعات حتى البونية ماتخرجش دم... بون على حسب ما سمعت توا ولاو يعملو تحليل للشعر على خاطر يقعد فيه اكثر...

توا اهم حاجة, أنا, يمكن كيفما برشا فيكم, ريت ولاد حومتي الكبار تشدو الكل بالواحد بالواحد, وكي سألت علاش قالولي عالزطلة, أنا وقتها صغيرة وما نعرفش ياخي فسرولي الي هي مضرة كالدخان قمت نبكي و نوح على حاجتين الحاجة الاولى الي نسخايب الي حتى أمي وبابا بش يشدوهم على خاطر هوما زادة يتكيفو (ماعرفتش الفرق مابين الدخان (المارس انتار) والزطلة) ياخي فسرولي, بون رضت وتهنيت... ومبعد عرضني ولد حومتي الي في عمرى يبكي قتلو شبيك قالي أمي مريضة على خاطر خويا الكبير خذا عام حبس خاطرو يتكيف فسرتلو وقتها الي هو ما هوش يتكيف في الدخان العادي الي يتكيفوه بوواتنا واماتنا ومبعد سخفوني هو وامو ووليت نبكي معاه...

تصور انتي حوما كاملة طاحت, والحومة هاذي جرت على الحوما الاخرى وفما حتى الي تشد في الحكاية وهو ما يتكيفش اما خرج التحليل (بوزيتف) على خاطرو قعد مع صحابو وهوما يتكيفو, بون هذاكا شقالت امو للجارة الي هي بيدها قالت لأمي الي عملتنا (كريز) في الدار وقالتلنا ما عادش فما خروج, والي لازمها تعرف عايلات صحابنا الكل... تنرفزت انا وقتها اما هو (نورمال) على خاطر البكا وقتها ما قصش في الحومة في (براسك) كل دار, حتى الي ماعندوش شكون تشد يعرف شكون طاح فيها...
باهي تعدى اكا العام ورجعو اولاد الحومة, الحكاية عندها توة 15 سنة ولا واحد فيهم يخدم... الي شادد الحيوط, الي عاود دخل للحبس, والي قطع مالبلاد جملة وحدة وعمرنا ما عاودنا ريناه...

خلي نحكي عاد علي رجعو دخلو للحبس... وهوني بش تفهمو شنوا اكثر حاجة تخليني نكون ضد الحبس على الزطلة... باهي الاولاد هاذم الكلهم ولاد عايلات كي التوانسة الكل... طايشين شوية, هيجة متاع صغر وبرا, اما مافيهمش عيب كبير ولا حاجة... تعلمو الزطلة كيفما غيرهم تعلم الدخان ولا الشراب... وكان هذاكا ذنبهم الوحيد, عمرهم لا قلقو حد و عمرهم ما جبدو حد, بالعكس اماتنا يبداو متهنين بيهم كي نبداو احنا الصغار نلعبو في الحومة, يعرفوهم لاهم بش يقلقونا ولاهم بش يخليو لعباد يقلقونا... لين نهار, او هو ليل سمعنا الصياح وخرجنا نطلو لقيناهم مخرجين زوز ومن غدوة زادو كملو البقية... عملو عامهم مابين المجرمة بانواعها, ومالي كانو مايعرفو من الدنيا شي, تعلمو كل شي بوه على خوه وباصعب طريقة... والله اعلم شنوا الي صار فيهم غادي... وفما شكون الي دارو بيه جماعة ماهمش ولاد حلال وعلموه ما اخطر ببرشى من الزطلة... وهذا حال اغلبية الي يدخلو للحبوسات... خرجو عاد, الي ناقم على الدنيا, والي دارو بيه الشواطن, ملي كانو مايضرو كان في رواحهم, ولاو يضرو في رواحهم وفي العباد...

بون الي كنت نحكي فيه توا فما شوية مزايدة وشوية خيال متاع طفلة صغيرة وشوية (ديتايات) نسيتهم, اما (غروسو مودو) الحكاية صارت و اكيد فما شكون منكم عاش ماكيفها, وبالنسبة للاخرين, الله لايوريكم غيار..

الحبس راهو للماليه للي قتل وللي اعتدى علي اعباد وللي سرق. والحبس ماهوش كان عقاب, هو اولا مجعول بش تحمي العباد من المجرمين, وبش تحمي المجرمين من العباد (ماكم تعرفو ساعات فما شكون الي يحب ياخو ثارو بيدو وتنجم تفهمو, اما نحنا كيفما يقولو في دولة القانون)
وهذا ماجا شي كي يبدا واحد مشدود على خاطرو تكيف الزطلة, (ديجا) ماهوش مجرم, ولا عندو لاشكون ضر ولا شكون بش يضرو.

 وثانيا الحبس هو وسيلة بش العباد هاذوكم يدفعو دينهم للمجتمع ومبعد يخرجو خفاف نظاف... المشكل انو العباد الكل ماهمش ملايكة وفما منهم الي داخل خارج على الحبس تقول دار خالتو, ويجيو عاد في الحبوسات ويبداو يلعبو بمخاخ العباد سورتو الشباب الي يبداو نفسيتهم هشة وبرشى ملي تشدو مالاول على حكاية فارغة يتشدو مبعد على ما اخطر...

نحب ناكد على حاجة, انا نحكي على المستهلكين مش على الي يبيعو في (النوار) للصغيرات... هاذكم لازم يتطبق عليهم القانون "بكل حزم" على خاطرهم بالرسمي يضرو في الناس ويستنفعو مالمضرة هاذي.

اما بالنسبة للمستهلكين علاش تحط فيهم في الحبس؟ شنوا المنفعة منها الحكاية هاذ؟ حريتو الشخصية بش يضر نفسو. (سورتو) انها دراسات عالمية تثبت انها الزطلة ماهيش مضرة اكثر مالشراب والدخان.. (دونك) فاش قام؟ تي فالاخر اكثريتهم كي يخرجو يرجعو يتكيفو وزيد مالفوق يلقى مستقبلو محطم, لا فما لاشكون بش يخدمو والعباد الكل تولي تغزرو درا كيفاش...

  هاو الراجل هذا يحكي عليها خير مني
[MAJ]

نزيد نأكد على حاجة اخرى, نحكي على مستهلكي الزطلة وموش المخدرات الاخرى الي هاذكا بالرسمي مضرتها كبيرة وتحطم ...العبد تردو زومبي حاشاكم... اما حتى هوما بلاصتهم موش في الحبس على خاطرهم لازمهم يتداواو مش يتعاقبو

(في غوض ما تحط في الحبس وعي وراقب وداوي و (ليغالاز



7 commentaires:

  1. j'adore ton post :)
    suis du même avis que toi pour la prison ... ça n'arrange rien du tout (pour ceux qui fument)

    RépondreSupprimer
    Réponses
    1. Merci !
      Oui malheureusement c'est une injustice inouïe qu'il faut rapidement régler...

      Supprimer
  2. on a besoin de soutien politique

    RépondreSupprimer
    Réponses
    1. Avez vous une idée sur les partis qui serait pour la légalisation? ou au moins la dépénalisation?

      Supprimer
  3. aaaaaaa3 je suis amoureux de toi :p

    RépondreSupprimer