تعرفوه المثل الي يقول يا قتال الروح وين تروح؟
انا لقيتلو الاجابة متاعو و (اون بلوس) طلعت ساهلة برشة
تروح ال تونس
بعده القضية متاع الشهداء الى يومنا هذا وهي كل مرة يأجلو فيها لين في اللخر ولا الحاكم (نقصد القاضي موش البوليس) ما عادش حتى
يتعب روحو ويعطي سبب التأجيل
يتعب روحو ويعطي سبب التأجيل
على فكرة عايلات الشهداء هزو رواحهم وقالو سفسارينا والدزاير وعندهم الحق... الحكاية هاذي ذكرتني باستاذة رماوها تقري ندراوين وقعدت غادي 12 سنا منسية ياخي وقت الي جابت صغير مشات هزتو للوزارة وحطتهولهم على الكنتوار متاع الاستفبال وقالتلهم هزوه ماحاشتيش بيه...
بعده سي الوزير الاول المؤقت يمشي للبلاد الي عايش فيها السفاح فرحا مسرورا ويقلك بالحرف الواحد
ونورمال...
ومبعد يجيو ويقولولنا راهو على خاطر السعوديين (الي (تالمون) يحيبونا نحينالهم الفيزا بش يجيو يطلو علينا) بش يعملو صفقات في تونس بقيمة زوز مليار دينار...
زغردوا يا نساوين... ارقصوا وغنو يا عايلات الشهداء... دم ولادكم جاب ال تونس زوز مليارات...
بعده الارهابيين تحوص في البلاد (اون تونو) بعد ما تسيبت الكل مالحبوسات (من حكاية سليمان) ومبعد الي يشارك في عمليات عنف بالسلاح يشارك... الي ياخو جامعات (اون اوتاج) ياخو والي يؤمر بالمعروف وينهي على المنكر يؤمر...
مالاخر قاتل الشهداء والمتطرف وحتى من الارهابيي والبيدوفيل يحوس في البلاد من غير مايقلقو حد... الوزير يمشي للسعودية ويقلكم الي هذاكا اكا السخطة الي قتلكم وعذبكم والكل مانيش بش نجيبو... يرجعو واحد قرييييييب من النظام السابق ويحطوه على راس راديو... التلميذ في الحبس على خاطر الزطلة والطالب مايقراش على خاطر النقاب اولية والصحفي في الحبس على خاطر تصويرة
والمواطن يتشتم هلى خاطر يطالب بحقو... والزوالي جيعان في كرشو وبردان في بدنو... (ديجا هذا الكل ما يذكركم بحتى شى؟) ونورمال
ايا عاد كانك عامل حاجة موش اكا الكل وماعينكش في المحاسبة تونس ترحب بك وتعلمك انها في اشد الاستعداد ان تصبح بلدك التاني ولا حتى الاول كان تحب (جوست) مشي حويجة على العينين...
للأسف كلامك صحيح,ربي يسترها تونس
RépondreSupprimer