mercredi 4 janvier 2012

#7ell حل مخك - حل اللعب



شكون فيكم يرضى بش يشري حاجة وما يشوفهش شنيا هيا؟
شكون فيكم يرضى بش يصحح على ورقة من غير ما يقراها؟
ولا شاك؟
ولا حتى وصل؟
في اللخر في اللخر شكون فيكم يرضى بقطوس في شكارة؟

وهوني نورمالمون تجاوبوني لا حتى حد وكيفاش ومايجيش وعيب وحرام وماهوش مقبول وماعندوش مبرر والشي هذا ماهوش في سبرنا
ويكون جوابكم صحيح اما هوني ماتربحوش تلفزة بالالوان اما اتاو نقلكم شنية تربحو

قبل كل شي خنفسرلكم الحكاية ايا حل مخك معايا

يا سيدك بن سيدك فما شكون قال انو مايجيش وعيب وحرام وماهوش مقبول وماعندوش مبرر انو الكلام الي يتقال في اللجنات يوصل للشعب بما انو الكلام هذاك ينجم يتخرج من اطارو و الشعب مايفهمش علاش تقال الكلام هذاك و تصير البلبلة وشي ماهوش لا في صالح لا البلاد لا العباد وكل و دو توت فاسون هاذوكم انتخبهم الشعب ودرا شنوا وعطاهم ثيقتو وهوما ماهمش بش يخذلوه... وحتى التالفونات موش لازم منها في اللجنة بش ماتصيرش تسريبات على خاطر كيفما يقولو الفرنسيس
Il vaut mieux laver le linge sale en famille
سامحوني مالقيتش كيفاش نقولها بالدارجة.
وعلى خاطر زادة الكلام الكل الي بش يتقال في اللجنات بش يتقال مبعد في المجلس التأسيسي على مراه و مسمع من الجميع مبعد مايتنقا ويتنضف بالطبيعة
وهوني نجيو لكا الجملة الي يستعملوها هوما برشا واحنا مانحبوهاش الي هي انو "وقد بلغ الشعب درجة من الوعي" بااااهييي ماهم قالوها ونهار كامل وهوما يعاودو فيها للي يسمع وللي مايسمعش, نحنا نقولولهم الي توا جا الوقت بش يطبقو الكلام هذا وراهو صحيح انو الشعب بلغ درجة من الوعي الي تخليه ينجم يشوف كل شي ويفهم من غير مايدخل البلاد في حيط
حاجا اخرى قالو وعاودو ماتحكموش علينا بالنوايا... باهي سيدي مشات معاك مناش بش نحكمو عليهم بالنوايا لا الخايبة لا الباهية زادة... احنا نحبو كل شي محلول وشفاف وفي متناول الجميع وهكاكة نجمو نحكمو عليهم بالافعال الخايبة والباهية زادة

نرجعو لحكاية صوت الشعب وانتخبهم الشعب صحيح اما الشعب ماصححهش على صك على بياض على خاطر الشعب الي قاعد توا يتفرج كل يوم على المجلس التأسيسي و الأخبار والجرايد والفاسبوك والكل ماهوش هو بيدو الي كان قبل لاعين ترا لاقلب يوجع وتو كينمشي للستاد تو نفش غيضي واكهو مكانش راهو بن علي مزال لهنا فرحا مسرورا... الشعب هذا يحب يعرف كل شي ويرا كل شي وللي يحب يدافع يدافع والي يحب يسب يسب وهاذيكا هي الديموقراطية 

  شنوا الربح؟

  ديجا كي نوصلو احنا للحكومة المفتوحة نتسماو ربحنا وما ربحنا على خاطر هذا نوع من التطور الي ماكناش حتى نحلمو بيه

نوليو نعرفو كل حزب على حقيقتو على خاطر في المجلس التأسيسي ماكم شفتو بحكم الديراكت فما شويا تمثيل ومزايدات وشعبوية واكا الكلام الكل

نتعداو من علاقة عمودية لعلاقة افقية ومعادش شكون يحكم وشكون يتحكم فيه ونوليو الكلنا نشاركو في القرارات
وعليه (هههه) تلانصات توا هالحكاية الباهية ياسر الي اسمها حل اللعب بش نهار الجمعة وقت المجلس التأسيسي يصادق على القانون الداخلي يتصرف كيفاش يعمل قانون بش اعمال اللجنات الكل يتنشر حبر على ورق وفي الانترنات والكل

هوني تشوفو هيثم بالقاسم (مؤتمر من اجل الجمهورية)  يحكي على الشفافية  
 



تنجمو تعاونو كي تحطو التصويرة هاذي في البروفيلات متاعكم 

 
والا البادج هاذا تلقاوه لهنا

وسورتو سورتو كي تحكيو عليها الحكاية وتوصلوها للعباد الكل

ايا حل مخك معايا




شويا ثقافة

Une définition de l’OpenGov et du Gov 2.0. (Fhimt.com)

Introduction au concept OpenGov et OpenData (Pensées Dangereuses de

Open Government Initiative Wikipedia

 

 



Aucun commentaire:

Enregistrer un commentaire