قبل كل شي وقبل ما تبداو تهزو و تنفضو على شماعنتها سافر/ة وشمعنتها السفور, نحب نقلكم الي انا نعرف بلقدا شماعنتها ها الكلمة و شنيا اصلها ومفصلها ومنين جايا و شنوا كانو يقصدو بيها و شنوا ولاو يقصدو بيها
يا سيدك بن سيدك السفور هو كشف الوجه وسَفَرَتِ المرأَة وجهها إِذا كشف النِّقابَ عن وجهها
هذاك الاصل, ولوالمعنى ما تبدلش اما توة الكلمة هذه ولات في المقصود بيها حاجة موش اكا الكل اما موش هذا موضوعنا
انا نعرف مليح يا سيدي الرئيس الي انت ماقصدتش حاجة موش اكا الكل بكلمتك هاذي, اما عندي ليك سؤال: فاش قام؟
فاش قام تصنف في المرا التونسية ال متنقبة و متحجبة وسافرة؟
ياخي هذاك هو حدنا احنا النسا؟
معنتها هذاك هو الي يحددنا وتوصفونا بيه؟
معنتها المرا تقرى ما تقراش, تخدم ما تخدمش, تعرس ما تعرسش. تجيب صغار و تربيهم ولا لا, تقتل عبد, تعمل اكتشافت علمية, اعمال فنية, تطلع للسما وتهبط, وسخطة على مخها تقعد كان متنقبة ولا متحجبة ولا سافرة؟
كهو؟
معنتها المرا هذي سافرة => نقطة؟
بطحاء محمد علي تونس 25/12/2010
وهذي, سيدي الرئيس متحجبة => نقطة ؟
14/01/11 شارع الحبيب بورقيبة
نعرف الي الموضوع هو حرية اللباس وعندي لهنا سؤال : كي انت حكيت على المتنقبة و المتحجبة والسافرة علاه ما حكيتش على المسفسرة والي تلبس الملية والشورط والسروال والجوب والتايور؟
حاجة اخرى زادة حرية اللباس هذيكا حاجة مكتسبة ومافيهاش رجوع بالتوالي, كل وحدة تلبس كيفما تحب في اطار المعقول ماعنتها كيفما وحدة ماتخرجش عريانة في الشارع والاخرى ماتلبسش الميني ولا البرتال ولا النقاب في الادارة ولا في المكتب
هذا الكل نحب نقول بيه انو المرا التونسية ماهيش متاع سافرة ومتنقبة ومتحجبة
المرا التونسية كل وحدة عندها حكايتها وقصتها وحياتها ومايجيش التنقيص من قيمها و تصنيفها بلبستها ولون شعرها والماركة متاع صباطها
الحكاية عندها توة ثلاثة ايام ومازالو لعباد يحكيو عليها في الانترنات (و 3 ايام بوقت الانترنات راهو برشى) على خاطرها ماهيش في بلاصتها وزايدة وخلقت مواضيع زايدة وركبو عليها العباد الكل من اقصى اليمين الى اقصى اليسار وهذاك يفسر ولاخر يندد ولخرى تبكي وعيطة وشهود على ذبيحة قنفود
هذاك علاش سيدي الرئيس لازم توة نفكو من الحكايات هاذوما ونتعداو لما اهم والي على خاطرو قامت الثورة والي هو يتلخص في ثلاثة كلمات خفاف نظاف : شغل - حرية - كرامة وطنية
والسلام
salut;
RépondreSupprimerce que vous disez est super. mais linguistiquement, je néglige pas:
1)constext du text (affaire université Mmannouba)
2)intention d'hauteur et but du texte( dépasser débat ideologique).
mes respects bent bladi vous bp plus que a dit le président
Je suis au courant du contexte, le problème c'est qu'en voulant dépasser ce débat idéologique on retombe plein dedans!
RépondreSupprimeret merci pour la dernière remarque :)